بنام الله
حيدر بابا
بايرام يلي چارداخلاري ييخاندا
نوروز گولي ، قار چيچگين ييخاندا
آغ بولوتلار كوينكلرين سيخاندا
بيزدن ده بير ياد ايلييه ن ساغ اولسون
دردلريميز قوي ديكلسون داغ اولسون
حيدر بابا يولوم سنن كج اولدي
عمروم گچدي گلممه ديم گج اولدي
هچ بيلمه ديم گوزللريم نج اولدي
بيلمزيديم دون گلر وار دونوم وار
ايتگين ليك وار آيريليق وار اولوم وار
حيدر بابا ايگيت امك ايتيرمز
عمر گچه ر ، افسوس بره بيتيرمز
بيزده والله اونوتماريق سيزلري
گورمه مسك حلال ادون بيزلري
حيدر بابا كندين گوني باتاندا
اوشاق لارون شامين ييوب ياتاندا
آي بولوتلار چيخوب قاش - گوز آتاندا
بيزدن ده بير سن اولارا قصه ده
قصه ميزدن چوخلي غم و غصه ده
قاري ننه گجه ناغيل ديه نده
كولك قالخيب ، قاب - باجاني دوينده
قورد گچينين شنگليسين يينده
من قاييديب بيرده اوشاق اوليديم
بير گول آچيب اوندان سورا سوليديم
حيدر بابا گل غنچه سي خنداندي
اما حيف ، اورك غذا سي قاندي
زندگانليق بير قارانليق زنداندي
بو زندانين دريچه سين آچان يوخ
بو دارليقين بير قور تولوب قاچان يوخ
حيدر بابا گويلر بوتون دوماندي
گونلريميز بير بيريندن ياماندي
بير بيروزدن آيريلمايون آماندي
حيدر بابا سنون گويلون شاد اولسون
دنيا وار كن آغزون دولي داد اولسون
سنن گچن تانيش اولسون ياد اولسون
دينه : منيم شاعر اوغلوم شهريار
بير عمر دور غم اوستونه غم قالار !